返回列表 發帖


薛凱琪自殺:今晚一定要死!

我冇諗過自己有抑鬱症,依家諗番早喺2008年年底做舞台劇《Last Smile,First Tear》時已經有事,如果我能及早治療,可能唔會咁嚴重。到我2009年拍電影《人間喜劇》時病發,體重暴跌至85磅,飾演癲角嘅我要喊就即刻開水喉,一NG就收,大家仲讚我拿捏得好,我心諗:「梗係啦,我真係癲架嘛!」有邊個會諗到我食住藥拍戲!                                                                                                                              
好驚出街  鎅手除痛
         
當時覺得好多事一下子堆埋過來,會將問題放到好大,覺得好多人辜負我,好多事都不愉快,覺得永遠是個自我可憐的女仔,當你接近死亡的時候就覺得沒有甚麼大不了。我第一次覺得自己有問題,係有次喺髮型屋叫外賣,我因為湯底錯咗而喊到癲,將髮型師都嚇壞。其實當時我的思維已經唔正常,但我唔知自己有病,好驚出街,喺屋企都驚,又無辦法同媽咪溝通,同媽咪拗撬令我個病更加嚴重,愈來愈瘦,一日食半個杯麵就飽,成日想死,開始玩鎅手,因為覺得個心裏面有好多見唔到的痛,日日都有好多種死的想法。                                                不想因病  連累他人         
我試過飲紅酒送安眠藥,其實當時潛意識知道分量不夠,但都博一鋪同自己說要死就死吧!直至有一晚我覺得好絕望,喊到崩潰,有股好大的力量推我去死,我同自己講:「唔得,你今晚一定要死。」但最後都無死到,因為我覺得抑鬱症是自私病,但我仲有一顆不自私的心,當想到我死咗,爹哋媽咪會好傷心,又會連累拍緊套戲爛尾蝕錢。當時死的念頭好強烈,連自己都覺得好驚,第一次意識到自己有病,第一次決定將秘密講畀人知,就喊住打畀大同(方大同):「我想自殺,你可唔可以stop我?」                                       
大同好理智地同我分析傾偈,臨收線時大同問:「你肯定今晚唔會死?」要我好肯定才收線,但他轉頭即靜靜打電話畀我媽咪知,事後我仲好嬲他,因為我覺得我信任你,先第一個話你知,為怕爹哋媽咪擔心,連佢哋都唔敢講,但你竟然話畀我媽咪知。                                       
依家我當然知道他做得啱。最初我連公司都瞞住,因為覺得是屬於私人事,但後來無法再隱瞞,因為我要工作要睡眠,我選擇了安眠藥,每晚要連食三隻強勁的安眠藥先可以入睡,但鬧鐘、電話完全聽唔到,如果公司唔知我有病,大家好難合作,因為我唔想公司以為我對工作唔上心。                                        求神寬恕  最難開口         
我個病嚟得突然,亦走得好快,好神奇地只是一年,由我兩個圈外好友輪流陪住我、鼓勵我去睇醫生,日日提我食藥。當時我有兩個心理醫生,一個開藥畀我,一個陪我傾偈,除了醫生,還有神的幫助。由一對新加坡的陌生夫婦義工輔導我,帶領我祈禱,由心底原諒所有傷害過我的人,但最難開口是要神原諒我自己,我喊到好緊要,但在原諒別人時候,都釋放了自己,之後我又幸運睇到一本書,睇到神的話「He will promise you the best for you!」,繼而反省,經過一年的治療終於識得笑,可能是心結解開了,當日醫生開的一盒五顏六色的藥,今時今日依然放在我床頭個櫃,就作為一個紀念。                                        Profile         
中文名:薛凱琪                                       
暱稱:Fiona/Fi                                       
出生日期:1981年8月11日                                       
Fiona在18歲開始兼職任模特兒,拍下多個廣告,2003年簽約華納唱片。Fiona出道至今有多首為人熟悉歌曲,包括《XBF》、《奇洛李維斯回信》及《男孩像你》等。Fiona於2005年開始拍攝電影,更憑首部作品《早熟》獲提名香港電影金像獎「最佳新演員」;2010年則憑《分手說愛你》奪得「2010年越南電影節最佳女主角」,並角逐香港電影金像獎「最佳女主角」

複製 引用 收藏 分享 評分

返回列表